Австрали улсын цагдаа нар Күинслэнд мужийн эрэгт эвдэрсэн загас агнуурын завинаас 2.3 тн кокайныг илрүүллээ. Дээрх их хэмжээний кокайныг гудамжинд худалдсан бол 490 сая ам.долларын үнэ хүрэх байжээ. Тус бүр 40 кг мансууруулах бодис бүхий 51 боодол кокайн завин дээр байжээ.
Загас агнуурын завь Күинслэндийн эрэгт хүрэхээсээ өмнө эргээс 18 км зайд эвдэрсэн байна. Завин дээр байсан болон завийг ирэхийг хүлээж байсан хүмүүсийг баривчилсан аж.
Цагдаа нар уг хэргийг илрүүлэхийн тулд хэдэн сарын өмнөөс мөрдлөгөө эхлүүлсэн байна. Уг хэрэг Команчеро нэртэй мотоциклын клубын гишүүдтэй холбоотой байжээ.
Австралийн түүхэнд тохиож байгаагүй их хэмжээний хууль бус кокайныг илрүүлсний дараа нийт 13 хүнийг баривчлан саатуулсан бөгөөд тэдгээр хүмүүсийн хоёр нь насанд хүрээгүй хүүхдүүд байжээ. Мөн Команчеро мото клубын дэд ерөнхийлөгч баривчлагдсан байна.
Команчеро клуб нь мансууруулах бодисны наймаа зэрэг гэмт хэргүүдтэй холбогдсоор ирсэн. Тус клуб 1980 оноос хойш Австрали улсад гарсан 1,000 гаруй галт зэвсгийн гэмт хэрэгт холбогдсон байна.
