Сонгуулийн санал хураалттай холбоотойгоор энэ сарын 10-12-ны хооронд архи, согтууруулах ундаа борлуулахгүй
Аймаг, нийслэл, сум, дүүргийн ИТХ-ын сонгуулийн санал хураалт энэ баасан гараг буюу аравдугаар сарын 11-ний 07:00-20:00 цагийн хооронд явагдана. Сонгуулийн санал хураалт явагдахтай холбоотойгоор энэ сарын 10-12-ны хооронд архи согтууруулах ундаа худалдах болон түүгээр үйлчлэхийг хориглоно.
Хуульд заасны дагуу санал авах өдөр согтууруулах ундаагаар үйлчлэх, худалдах, соёл урлаг, үзвэр, спортын зэрэг олныг хамарсан аливаа арга хэмжээ зохион байгуулахыг хориглодог. Түүнчлэн гадаа болон битүү талбайд үйл ажиллагаа явуулдаг худалдаа, үйлчилгээний төвүүд ажиллахгүй байх зохицуулалт бий.
Тодруулбал: Аймаг, нийслэл, сум, дүүргийн ИТХ-ын сонгуулийн тухай хуулийн 69 дүгээр зүйлд:
69.1.Санал авах өдөр дараах үйл ажиллагааг хориглох бөгөөд аймаг, нийслэлийн Засаг дарга холбогдох шийдвэр гарган хяналт тавьж ажиллана.
69.1.1.согтууруулах ундаагаар үйлчлэх, худалдах;
69.1.2.соёл урлаг, үзвэр, спортын зэрэг олныг хамарсан аливаа арга хэмжээ зохион байгуулах;
69.1.3.гадаа болон битүү талбайд үйл ажиллагаа явуулдаг худалдаа, үйлчилгээний төв ажиллах хэмээн заасан байдаг.
Орон нутгийн сонгуулийн үр дүнгээс таны амьдралын чанар шууд хамаарах учир сонгуульдоо идэвхитэй оролцож, сонголтоо зөв хийгээрэй.
