Бидний амьдралын чанарт шууд нөлөөлөх шийдвэрүүдийг гаргадаг орон нутгийн ИТХ-ын төлөөлөгчөө сонгоход ердөө дөрвөн хоног үлдлээ. Аймаг, нийслэл, сум, дүүргийн Иргэдийн төлөөлөгчдийн хурлын 2024 оны ээлжит сонгууль аравдугаар сарын 11-ний өдөр болно. Сонгогчийн саналыг тус өдөр буюу баасан гарагт Улаанбаатарын цагаар 07.00-20.00 цаг хүртэл авна.
Аймаг, нийслэл, сум, дүүргийн иргэдийн төлөөлөгчдийн хурлын сонгуулийн тухай хуулийн 38.1-д “Сонгуулийн сурталчилгааг нэр дэвшигчид үнэмлэх олгосон өдрөөс эхлүүлж, санал авах өдрөөс 24 цагийн өмнө буюу санал авах өдрийн өмнөх өдрийн 00:00 цагаас өмнө зогсооно” гэж заасан. Тиймээс нэр дэвшигчид аравдугаар сарын 9-нд сурталчилгаагаа зогсоох ёстой.
Сонгуулийн санал хураалт аравдугаар сарын 11-ний 20 цагт дуусч, үүнээс 7 хоногийн дараа буюу аравдугаар сарын 18-д Аймаг, нийслэл, сум, дүүргийн иргэдийн төлөөлөгчдийн хурлын сонгуулийн тухай хуулийн 73.4-д “Тухайн шатны сонгуулийн хороо сонгуулийн дүн болон Төлөөлөгчөөр сонгогдсонд тооцох тухай шийдвэрийг сонгууль дууссанаас хойш долоо хоногийн дотор тухайн шатны иргэдийн Төлөөлөгчдийн Хуралд өргөн мэдүүлнэ” гэж заасанчлан ИТХ-д өргөн мэдүүлэх юм байна.
Орон нутгийн сонгууль таны амьдралын чанарт шууд нөлөөлнө гэдгийг санан санан та сонгуульдаа идэвхитэй оролцож, сонголтоо зөв хийгээрэй.
