50 нас хүрсэн эмэгтэй бүр ямар нэг хэмжээгээр яс, үе мөчний бэртэл, гэмтэл авсан байдаг нь цэвэршилтийн үед ясны сийрэгжилт хурдасч яс хэврэг болсонтой холбоотой.
Ясанд очих эстроген дааврын хэмжээ багасах тусам яс сийрэгжих эрсдэл нэмэгддэг. Өндгөвчөө залуу насандаа авахуулах, огцом жин хасах, хэт өндөр ачаалалттай дасгал хөдөлгөөн хийх, бамбай булчирхайн эмгэг, аарцгийн хөндийн өвчлөл, дааврын стеройд, жирэмснээс сэргийлэх бэлдмэл, тарилгууд ясыг хэврэг болгодог.
Иймээс дараах зөвлөмжийг хүргэж байна. Үүнд:
Өндрөө хэмжиж тэмдэглэн, хянах хэрэгтэй. 4см-р намхан болсон бол ихэд анхаарч, эмчид хандаж ясны сийрэгжилт тодорхойлох шинжилгээнд хамрагдах нь зүйтэй. Жич: Хүн өөрийн өндөртэй тэнцүү өндрөөс унахад яс хугарах ёсгүй байдаг.
Ясанд Д амин дэм маш хэрэгцээтэй ба жилийн 4 улиралд өдөр бүр 10 минут нарны илчийг авах нь Д аминдэмийн нийлэгжилтэд эерэг нөлөөтэй. Д аминдэмийн өндөр дутагдалтай нь шинжилгээгээр тогтоогдсон бол эмчид хандан яаралтай хариу арга хэмжээ аваарай.
Д аминдэм бага үед кофе, хийжүүлсэн ундаа хэтрүүлэн уухаас татгалзах хэрэгтэй. Мөн амьтны гаралтай уураг, цардуул хүчиллэг ихтэй хүнсний хэрэглээг хязгаарлах нь ясан дахь калцийг барихад тустай.
Эх сурвалж: Цэвэршилт ба даавар- Menopause, Andropause and Hormones цахим хуудас
