Ерөнхийлөгч У. Хүрэлсүхийн Нью Йорк дахь уулзалтуудыг цуцалсан байж мэдэх тухай албан бус мэдээлэл явж байна. НҮБ-ын Ерөнхий Ассемблэйн нээлтийн ажиллагаанд улс орнуудын удирдагч нар очиж, хурлын бус цагуудаар албан уулзалтууд хийдэг уламжлалтай. Тэгвэл манай улсын Ерөнхийлөгчтэй хийх уулзалтууд цуцлагдсан тухай албан бус мэдээлэл гарчээ. Одоогийн байдлаар Монгол Улсыг ямар ч цаг үед дэмжиж, хамтарч ирсэн Японы Ерөнхий сайд Ф.Кишида, өнгөрсөн зун хаан нь зочлоод явсан Бутаны Ерөнхий сайд Цэрэн Тобгай нартай уулзснаас өөр албан мэдээлэл Ерөнхийлөгчийн албан ёсны сайт дээр алга байна. Харин энэ жилийн ассемблэйд оролцож байгаа 83 улсын төрийн тэргүүн, хоёр улсын дэд Ерөнхийлөгч, 52 улсын Засгийн газрын тэргүүн, 5 гишүүн улсын Шадар сайд нараас нэмж хүмүүстэй уулзалт хийхгүй бол яах аргагүй өнгөрөгч өдрүүдэд манайд айлчилсан ОХУ-ын Ерөнхийлөгч В.Путины айлчлалтай холбоотой байж таарах биз ээ.
Энэхүү чуулга уулзалтын үеэр энэ мэт байдал үүсэхийг манайхан тооцоолоогүй биш тооцоолсон байх учиртай. Гэхдээ нэгэн цагийн хамтын ялалтын ойгоо тэмдэглэхээр ирсэн мөнхийн хөрш орны төрийн тэргүүн, нөгөө талаас эдийн засаг болон бусад хүчин зүйлийн нягт холбоотой орны айлчлалыг хүлээн авахаас аргагүй нөхцөл байдлыг бусад улс орны төрийн тэргүүнүүд ч ойлгож байх учиртай. НҮБ болон бусад улс орнуудын зүгээс манайд хориг мэдрүүлж байгаа алхам нь ч зүй ёсных. Ерөнхийдөө ийм зүйл болох байсан, түүгээрээ болж байх шиг байна. Нөгөө талаас дайны гэмт хэрэгтэнг хүлээж авсан “гэм”-тэй Монгол Улсын төрийн тэргүүнд элдэв хоригоос үл халшран бараалхсан Япон, Бутаны Ерөнхий сайд нарт талархах хэрэгтэй болов уу.
