“Дархан, Сэлэнгийн цахилгаан түгээх сүлжээ” ХК “Чулуун карьер” дэд станцаа дижитал станц болгохоор бэлтгэж байгаа аж . “Чулуун карьер” дэд станц Дархан-Уул аймгийн Дархан сумын 5, 6, 7, 8-р баг, Хөтөл хороолол, Малчин багийг цахилгаанаар ханган ажилладаг.
Уг дэд станцын хэрэглэгчдийг өчигдрөөс түр схемд шилжүүлсэн байна. Тус ажилд “ДСЦТС” ХК-ийн Засвар, туршилт тохируулгын алба, Ашиглалт, засварын алба, Хэмжүүр, тоолуур, лабораторийн алба, Авто тээврийн албаны нийт 30 гаруй хүн оролцож байна. Тэд “Чулуун карьер” дэд станцыг дижитал технологид шилжүүлэхэд 2 сар зарцуулахаар төлөвлөжээ.
Дээрх дэд станцыг дижитал болгосноор засварын баг очиж, засвар үйлчилгээ хийх шаардлагагүй болно. Түүнчлэн шуурхай үйлчилгээг алсын удирдлагаар гүйцэтгэх бөгөөд үр дүн нь цаг хэмнэх, хэрэглэгчдийг удаан цахилгаангүй байлгахгүй болох зэрэг давуу талтай болох юм.
