Z-MAN Улс төрийн хураангуй…
Олимпизмын сайд асан Бадмаанмябуугийн Бат-Эрдэнийн чих их халууцаж байгаа болов уу. Өчигдөр тус салбарын асуудал эрхлэх Байнгын хорооны хурал дээр Г. Дамдинням нар олимпизмын сайдтай болоод, урьд байгаагүй төсөв мөнгө тавиад, урьд өмнө байгаагаагүй муу амжилтыг үзүүллээ гэж шүүмжилсэн нь ямар ч хилсгүй юм. Байнгын хороон дарга Ч.Ундрам эл асуудлыг тусгайлан хэлэлцэж, банга донго хүртээх тухай хэлсэн ч, улсад арван нэг түрүүлж, УИХ-д тавантай сууж хорин жил болоод буусан, олимпийн амжилтгүй Б.Бат-Эрдэнээс олж долоох зүйл үгүй дээ.
Ингэж биднийг мунгинаж суутал харин хэдхээн цагийн өмнө, паралимпод хүч үзсэн, таеквондоч У. Сүрэнжав хэмээх жаалхан охин алтан медаль хүртэв. Манай улс тусгай хэрэгцээт иргэдээ жендерийг дэмжигч, тэгш оролцоог хангахын төлөөх иргэний нийгмийн байгууллагууд, тэдний олон улстай хөл нийлүүлэгч хөгжлийн бодлогын тэмүүлэл, үйл ажиллагааны хүчинд бодьтой дэмжиж, нийгмийн оролцоонд идэвхийлүүлж эхэлсэн. Үүний ч хүчинд хууль тогтоох дээд байгууллагад төлөөллүүд сонгогдож, орхигдсон, хэвшмэл хуучинсаг хандлагаа бага багаар халж байгаа ч, хангалттай түвшинд хүрэхэд ихээхэн цаг хугацаа шаардагдахаар нь нууц биш. Голсон юм голд орно гэж үг байдаг.
Паралимпийнханд үнэхээр бодит анхаарал тавьсан эсэх нь эргэлзээтэй. Гэвч тэд чадаж байна, тэр тусмаа хүүхнүүд, охидын төлөөлөл салхи зүсэж, зам гаргаж байгаа нь бахдалтай. Мөдхөн орон нутгийн сонгууль болох гэж байна. Манай эрх баригчид, хууль тогтоогчид УИХ-ын сонгуульд хүйсийн тэгш төлөөллийг оруулахад зохих ахиц гаргаж , үр дүнд хүрсэн ч, эл дэвшлээ Орон нутгийн сонгуулийн тухай хуульд биежүүлсэнгүй. Хууль болгоогүй. Хэдий ийм ч, иргэний нийгмийн амьдралын хамгийн чухал сонгуульд хүйсийн тэгш төлөөллийг УИХ-ын сонгуульд хуульчилсан шигээ үзэл баримтлалаар , дэвшлээр хангаж оролцох нь онцгой шаардлага юм. Үнэндээ гэхэд, явж явж Монголын хүүхнүүд л улс орноо өнгөтэй өөдтэйгээр илэрхийлж байна шүү дээ. Нуух аргагүй үнэн энэ. Парист, ертөнцөд Б.Баасанхүү, У.Сүрэнжав гэдэг хоёр охин л Монголын нэрийг гаргаж, алт, мөнгөн медаль авлаав шүү дээ. Z man
