АНУ-ын зүүн эргийн Балтимор боомт дахь Фрэнсис Скотт-Ки гүүрний баганыг мягмар гарагийн 01:30 цагийн үед чингэлэгт усан онгоц мөргөснөөр гүүр нурсан юм.
Нөхцөл байдал хүнд байгаа тул эрэн хайх, аврах ажиллагааг түр хугацаанд зогсоож байна. Тодруулбал, голын ус хүйтэн, гүүрний хэсгүүд усанд хөвж, эрэн хайх ажиллагаанд хүндрэл учруулж байгаа юм.
Гүүр нурах үед гүүрэн дээр ажиллаж байсан найман ажилтан гол руу унасан бөгөөд хоёр хүнийг нь эсэн мэнд олж, үлдсэн зургаан ажилтныг 18 цагийн турш хайсны эцэст амь үрэгдсэн байж болзошгүй хэмээн үзэж байна. Өнөөдөр өглөө аврах багийнхан зургаан ажилтны хоёрынх нь цогцсыг олсноо мэдэгдлээ.
Харин үлдсэн хүмүүсийг хайх ажиллагааг түр зогсоогоод байна. Учир нь гүүрний хэсгүүдийг уснаас гаргасны дараа шумбагчид үлдсэн дөрвөн хүнийг үргэлжлүүлэн хайна гэв.
АНУ-ын Ерөнхийлөгч Жо Байден гүүрийг сэргээн засварлах ажлын зардлыг Засгийн газар бүрэн хариуцах ёстой хэмээн мэдэгдсэн.
Эх сурвалж: BBC
