“Хүннү рок” урсгалыг үндэслэгч “Чингис хаан” одонт “Хү” хамтлаг эх орондоо анх удаа бүрэн хэмжээний тоглолт хийхээр болсон талаар бид өмнө нь мэдээлж байсан.
Гэхдээ уг тоглолт нь долдугаар сарын 20-нд Архангай аймгийн Цэцэрлэг сумын “Ара” цэнгэлдэх хүрээлэнд зохион байгуулах тоглолтын мэдээлэл байсан юм.
Тэгвэл тэд үүнээс өмнө Ардын хувьсгалын 103 жилийн ойг тохиолдуулан Улаанбаатар хотод тоглолтоо хийхээр болсон мэдээ өчигдрөөс цахим ертөнцөд тархлаа. Тодруулбал, үндэсний их баяр наадмын өмнөх өдөр буюу долдугаар сарын 10-ны өдөр “Хит парк”-т эх орондоо хийх бүрэн хэмжээний тоглолтынхоо салхийг хагалахаар болжээ. Тасалбар 99 мянга, 600 мянга, хоёр сая төгрөгийн үнэтэй бөгөөд гурван өөр зэрэглэлээрээ ийн ялгаатай аж.
“Хү хамтлагийнхан “Rumble of Thunder” нэртэй хоёр дахь цомгоо худалдаанд гаргасан бөгөөд уг цомогт “Учиртай гурав”, “Шихихутаг”, “Татар дайчин”, “Хар аянга”, “Байгаль эх” зэрэг 13 дуу багтсан байна.
2016 онд байгуулагдсанаасаа хойш богино хугацаанд олон улсад танигдаж чадсан Монголын амжилттай яваа хамтлаг юм. Их эзэн Чингис хааны мэндэлсний ой, өвлийн тэргүүн сарын шинийн нэгэн Монгол бахархлын өдөр /2019.11.27/ “Хү” хамтлагийнханд Монгол төрийн дээд шагнал, тэргүүн зэргийн Чингис хаан одонг хүртээсэн билээ. Анх 2005 оноос Чингис хаан одонг олгож эхэлсэн бөгөөд энэ жил “Хүннү рок” урсгалаар уран бүтээл туурвидаг “ Хү” хамтлагийн продюсер Б.Дашдондогт тус одонг гардуулсан юм.
