Өнгөрсөн жил Туул голын эрэг дагуу иргэдийг голын усны ослоос сэргийлэх, сэрэмжлүүлэг мэдээллийг хүргэх, зорчих хөдөлгөөнд хяналт тавьж аюулгүй байдлыг хангах зорилгоор Нийслэлийн Онцгой байдлын газар, “Мандал даатгал” ХХК-тай хамтран таван байршилд хяналтын камер байршуулсан. Тэгвэл эдгээр камер нь нэг чигийн болон 360 градус эргэдэг бөгөөд километрийн радиусыг хянаж, цагаан хоолойгоор дуут сэрэмжлүүлгийг 200 метр зайд иргэдэд хүргэж байна.
Урин дулаантай холбоотойгоор гол усанд орох иргэдийн тоо нэмэгдэж, үүнийгээ даган усанд осолдох тохиолдол ч ихэсдэг байна. Өнгөрсөн онд л гэхэд улсын хэмжээнд нийт 53 удаагийн усны осол бүртгэгдэж, 49 иргэн амь насаа алдсаны 14 нь хүүхэд, 35 нь том хүн байжээ. Он гарсаар 18 хүн гол усанд осолдож нас бараад байна.
Өнгөрөгч аравнаас эхлэн (2024.06.10) иргэдийг нийслэлийн нутаг дэвсгэрт гол, усны ослоос урьдчилан сэргийлэх зорилгоор Туул, Тэрэлж, Хэрлэн гол дагуу завьт эргүүл ажиллаж эхэлжээ. Нийслэлийн Засаг даргын 2024 оны “Гол, усны ослоос урьдчилан сэргийлэх талаар авах зарим арга хэмжээний тухай” захирамжийн хүрээнд нийслэлийн Онцгой байдлын газар, нийслэлийн Цагдаагийн удирдах газар, Гэр бүл хүүхэд, залуучуудын хөгжлийн газрын хамтарсан бүрэлдэхүүн хуваарийн дагуу үүрэг гүйцэтгэх гэнэ.
