Орос Украины дайн эхэлснээс хойш АНУ Украиныг ОХУ-ын газар нутагт цохилт өгөх, тэр тусмаа АНУ-аас нийлүүлсэн зэвсгээр цохилт өгөхийг эрс эсэргүүцэж ирсэн.
Харин барууны орнуудын удирдагч нар сүүлийн үед Украин баруунаас нийлүүлсэн зэвсгээр Оросын газар нутагт агаарын цохилт өгөхийг дэмжиж эхэлсэн юм.
Үүний улмаас АНУ-ын Ерөнхийлөгч Жо Байденд Украинд зөвшөөрөл олгох шахалт ирэх болсон байна.
Францын Ерөнхийлөгч Эммануэль Макрон, Германы Канцлер Олаф Шольц нар мягмар гарагт /2024.05.28/ Украин агаарын цохилт өгөх эрхтэй гэж хэлсний дараа Байден пүрэв гарагт /2024.05.30/ Украинд зөвшөөрөл өгчээ.
Украины Ерөнхийлөгч Володимир Зеленский ийнхүү хүсэн хүлээсэн зөвшөөрлөө Байденаас авлаа. Гэхдээ Байден зөвхөн Харьков мужтай ойролцоох Оросын хил давж л цохилт өгч болно гэсэн байна.
ОХУ-ын зэвсэгт хүчин энэ сарын эхээр Харьков мужид гэнэтийн довтолгоо явуулж, дайнд дахин нэг фронт нэмсэн билээ. Гэнэтийн довтолгоо эхлүүлснээсээ хойш Оросын арми Харьковын хэд хэдэн тосгоныг эзэлж аваад байгаа юм.
