Өнгөрсөн долоо хоногт ой хээрийн түймэр дөрвөн удаа гарсан байна. Онцгой байдлын алба хаагчид өчигдөр буюу гуравдугаар сарын 31-нд Булган аймгийн Хутаг-Өндөр суманд ой хээрийн түймэр гарсан дуудлага 15:49 цагт хүлээн авч, 18:14 цагт цурамд оруулсан байна. Урьдчилсан байдлаар 2.5 га талбай өртжээ.Мөн нийслэл, орон нутагт обьектийн гал түймрийн найман тохиолдол гарсан байна.
Улаанбаатар хот, Хан-Уул дүүрэг XX хороо, “Хөрш заан” хотхоны урд “Туул” голын бургасанд гал гарч байна гэсэн дуудлага /2024-03-31/ өчигдөр 19:57 цагт иржээ. Дуудлагын дагуу тус дүүргийн Онцгой байдлын хэлтсийн Гал түймэр унтраах аврах, 14 дүгээр ангийн алба хаагчид ажиллаж иргэн Н шашны зан үйл үйлдэж бургасан дунд гал гаргасныг унтрааж аюулгүй болгожээ. Мөн тухайн иргэнийг цагдаагийн байгууллагад хүлээлгэн өгчээ.
Цасан бүрхүүл багасаж, хаврын хуурайшилтын улирал эхэлж байгаатай холбоотой санаатай болон санамсаргүй байдлаас гал алдаж хувийн болон нийтийн өмчид их хэмжээний хохирол учруулах эрсдэлтэй байна. Тиймээс анхаарал болгоомжтой байж гал түймрийн аюулаас сэрэмжилнэ үү!!!
