Монгол туургатан нийтээрээ туулай жилээ үдэж, луу жилийг угтлаа. Амралтын өдөр дамнасан сар шинийн өдрүүдэд амжиж золголтоо хийх гэсэн түмэн олон нэг айлаас нөгөө айл хүртэл их л яаруу явж байгаа нь харагдсан. Их хотын түгжрэл дундуур хоёр өдөрт багтаж шинэлнэ гэдэг боломжгүй зүйл мэт боловч бид болгоод л амжууллаа. Өнөөдрөөс албан газрын золголтууд үргэлжилж, энэ долоо хоногтоо цагаан сарын уур амьсгал давамгайлах нь гарцаагүй бололтой.
Монголчууд бид зөв баярлаж сурч байгаа мэдрэмж энэ жил улам бүр батлагдлаа. Өр, зээл тавин байж нүсэр шинэлэхээ больж, өрөөлийг танихгүй болтлоо архинд хөлчүүрхэхээ ч больж одоо л зөв баярлаж сурч байна даа гэх мэдрэмж төрч байна. Сар шинийн баяр нь угтаа ураг садантайгаа уулзан золгох, өв уламжлалаа өвлүүлэх философийг л агуулдаг аж. Үүний мөн чанарыг бид ойлгож эхэлж байна. Угтаа нийгмийн шилжилтийн он жилүүдэд энэ агуулга хэсэг тасарч гээгдсэн бололтой. Тасарсан ч бид зөн мэдрэмжээрээ түүнийгээ олж, эвлүүлсээр л байна. Цаашид ч улам л үндсэн агуулга руугаа ойртох нь гарцаагүй биз.
