Монгол улсын ЦХХХЯ-ны сайд Н. Учрал АНУ-д айлчлал хийж буй билээ. Тус айлчлалын хүрээнд дэлхийн тэргүүлэх технологийн компани болох Google компанийн удирдлагуудтай уулзалт хийлээ.
Айлчлалын үеэр Google-ийн Chrome үйлдлийн системийг хариуцсан дэд ерөнхийлөгч Жон Соломонтой уулзаж иргэдийн зүгээс ирсэн хүсэлт болон Газар зүй, геодези зураг зүйн газрын хүсэлтийг уламжлан Монгол улсын нутаг дэвсгэр дээрх газар зүйн байршлын нэрсийг алдаатай бичигдсэнийг өөрчлөн засварлуулжээ.
Мөн Google компанитай хамтарч 1,500 хүний нөөц бэлтгэх чиглэлээр хамтын ажиллагаагаа бататгаж, Монголд цахим ур чадварын төв байгуулж, бүс нутагт туршлага хуваалцах чиглэлээр хамтарч ажиллах болон Android in-app purchase-ийг энэ оны 2 дугаар хагаст нэвтрүүлэхээр зөвшилцсөн байна.
Эдгээрээс гадна Google компанийн зүгээс Стартап компаниудад Google for startups хөтөлбөрийг хэрэгжүүлэх, Монгол Улсын Android хөгжүүлэгч нарт Playstore-оор дамжуулан төлбөр авах, контент хөгжүүлэгч нар Youtube-ээс орлогын эх үүсвэртэй болох боломжийг нээхээр ажиллаж буй юм.
Мөн Google компанитай хамтран Family link системийн монгол хувилбарыг амжилттай нэвтрүүлээд буй юм. Та тус системийг ашиглан хүүхдийнхээ байршлыг мэдэж, аюулгүй байдлыг хангаж, гар утасны хэрэглээг нь хянах боломжтой юм.
