Өвөрхангай аймагт багш, ажилчдын амьдардаг байрны дээвэр нуржээ. Үүнээс шалтгаалан эрсдэлтэй нөхцөл байдал үүссэн талаар мэдээлэл цахим орчинд цацагдсан. Тодруулбал, өнгөрсөн амралтын өдөр байрны дээвэр нурсанаас шалтгаалан цахилгааны шон унах аюултай нөхцөл байдал үүссэн байна. Тухайн байр нь Өвөрхангай аймгийн Зүүнбаян-Улаан сумын ЕБС-ийн багш, ажилчдын амьдардаг 22 айлын орон сууц юм.
Байрны дээвэр нурснаас гэмтэж бэртсэн хүн байхгүй ч, оршин суугчид амьдрах газаргүй болсон талаар сумын иргэд хэлж байгаа юм. Эх сурвалжийн мэдээлснээр уг барилгыг тендэрт шалгарсан компани хоёр сарын өмнө ажлаа дуусгаж сумын удирдлагуудад хүлээлгэж өгөөд удаагүй байсан аж. Тухайн байрыг орон нутгийн төсвийн 50 сая төгрөгөөр засварласан ажээ. Харин сумын Засаг даргийн зүгээс тухайн байрыг сумын комисс хүлээж аваагүй байсан бөгөөд дахин засварлах ажлыг тендерт шалгарсан “Сод-Ээл” компани хийж, гүйцэтгэнэ гэх мэдээллийг өгч байгаа аж.
