Иша шуурганы улмаас нислэгүүдийн төлөвлөгөө өөрчлөгдөж, зарим нь цуцлагдан, зарим нь чиглэлээ өөрчилсөн байна.
Аль нэг улсад очиход хамгийн хурдан хүрэх арга бол мэдээж онгоцоор нисэх юм. Ирланд, Их Британийн зорчигчдын хувьд Ням гаригийн шөнийн нислэг нь нэг төрлийн аялал болж хувирсан байна. Дээрх улсуудын нисэх буудлууд ойролцоогоор 145 км/цаг хурдтай шуурганд өртсөн аж.
Тиймээс олон нисэх онгоц Европ дотроо чиглэлээ өөрчлөн, аюулгүй газарт газардсан байна. “Ryanair” компанийн нислэгүүдэд шуурга онцгойлон нөлөөлсөн. Тодруулбал, Дублинд төвтэй тус компанийн 166 хөөрөх, буух нислэгүүд цуцлагдсан байна.
“Ryanair”-ын “FR555” нислэг л гэхэд Манчестерээс Дублин руу ниссэн боловч Парист буусан. Манчестер-Дублин чиглэлийн өөр нэг нислэг Их Британи, Ирландын хооронд гурван цаг гаруй нааш цааш нисжээ. Эцэст нь газардах ёстой буудлаасаа 50-хан км зайд орших Ливерпулд буусан аж. Энэ мэтчилэн зарим онгоц нь анх хөөрсөн цэгтээ буцаад очсон тохиолдол ч гарсан байна.
Нислэгийг хянах цахим хуудсууд хачин жигтэй маршрутын зургуудаар дүүрсэн байна. Ингээд Даваа гаригийн өглөө болоход бүх онгоц Европ даяар хаа сайгүй тарсан байжээ. Их Британийн агаарын тээврийн хяналтын оператор компаниас мэдээлснээр хүчтэй шуурга зөвхөн нисэх онгоцны чиглэлээр тогтохгүй газрын тээвэрт ч нөлөөлсөн гэж үзжээ
