Цагаан сарын баяр болоход цөөхөн хоног үлдээд буй. Энэ үеэр иргэдийн худалдан авалт ихэсдэг. Зах зээл дээр эрэлт өсөхийн зэрэгцээ бараа бүтээгдэхүүний үнэ өсч, арилжаа наймаачид гэнэтийн ашиг олдог нь хэдийнэ тогтсон хэв маяг болжээ. Нэгдүгээр сарын 10-ны байдлаар нийслэлд гол нэрийн барааны үнэ өмнөх долоо хоногоос 0,6 хувиар өмнөх сараас 2,3 хувиар өссөн аж.
Тухайлбал, хонины мах 1,1 хувь, сонгино 2,4 хувь, төмс 4 хувь өссөн бол өндөг 0,4 хувиар буурчээ.
Иргэдийн хамгийн их худалдан авдаг бараа бүтээгдэхүүний үнэ ердөө долоо хоногийн дотор 0,5-1 хувиар өссөн үзүүлэлт нь цагаан сар ойртож буйтай холбоотой.
15 ШИРХЭГТЭЙ УЛ БООВ, СУУРЬ ЕЭВЭНГИЙН БАГЦ 96 МЯНГААС ЭХЭЛЖ БАЙНА
Цагаан сараар өргөн хэрэглэдэг хүнс бол хэвийн боов. Хэвийн боовны нэг ширхэгийн дундаж үнэ энэ жил 5000-5200 төгрөг байна. Гэхдээ үйлдвэр бүрээсээ шалтгаалж үнийн дүн харилцан адилгүй байна.
Тухайлбал, “Өгөөж, чихэр боов” компани 15 ширхэг хэвийн боов, еэвэнгийн багц 96 мянган төгрөгөөр худалдаанд гарчээ. Бусад үйлдвэрүүдийн ижил багцын үнэ 76-105 мянган төгрөгийн хооронд байна.
Хонины ууцны дээд үнийн дундаж 450-520 мянган төгрөг доод үнийн дундаж 260-280 мянган төгрөг байгаа юм. Сүүн ааруулын дундаж үнэ 32-35 мянган төгрөг байгаа бол хорхой ааруулын дундаж 22-24 мянган төгрөг, задгай сүү 3500-3800 төгрөг, шинэ сүү 4500 төгрөг байна.
Өргөн хэрэглээний зөвхөн хүнсний бүтээгдэхүүний үнийг тооцож үзвэл энэ жил нэг айл дунджаар 1-1,5 сая төгрөгөөр зөвхөн ширээгээ засах нь. Үүн дээр шинэ дээл хувцас, золголтын мөнгө, гарын бэлгийг нэмвэл хоёр сая төгрөг хол давахаар байна.
