УИХ-ын гишүүд, сайд дарга нарт наадмын урилга өгөхгүй, харин тасалбарыг 100 хувь худалдаанд гаргах бодолтой байгаагаа Үндэсний баяр наадмын комиссын дарга Н.Номтойбаяр хэлжээ. Энэ мэдээллийн дор төрийн өндөрлөг гэгдэх гурван хүнээс бусдыг тэнд суулгах шаардлагагүй, тасалбарыг худалдах хэрэгтэй талаар, энэ шийдвэр зөв гэж үзэж буйгаа олон хүн илэрхийлж байна. Төр түшиж байгаа хэдэн хүнд угаасаа төрийн тусгай хамгаалалт гарчихаад энгийн иргэд орж суух боломж байхгүй тэр хэсгийн урилгыг өгчихөд болохгүй зүйлгүй л дээ. Гэхдээ тэгш бус байдал газар авч, иргэддээ хатуу, дарга сэтэртнүүдэд ялгамжтай ханддаг байдал хэрээс хэтэрсэн учраас иргэд ийнхүү бухимдалтай байгаа юм. Төр төмбөгөр, ёс ёмбогор гэж ханддаг хүмүүс наадмын талбайн индэр дээрээс тэдний эхнэр, хүүхдийг үздэг болсоор удсан учраас Н.Номтойбаярын энэхүү шийдвэрийг дэмжиж байгаагаа илэрхийлжээ.
Харин ийнхүү дуулиан хадуулж мэдээлэл гаргачихаад өмнөхийн адил бахь байдгаараа байвал иргэд илүүтэй бухимдана гэдгийг эрхбиш дарга сайд нар ойлгох биз ээ.
