Стратеги судалгааны хүрээлэнгийн номын санг Америк дахь Монгол судлалыг үндэслэгч, нэрт монголч эрдэмтэн Оуэн Латтиморын нэрэмжит болгох арга хэмжээг 2026 оны гуравдугаар сарын 12-нд зохион байгуулав. Арга хэмжээнд Онц бөгөөд Бүрэн эрхт Элчин сайд, доктор Р.Болд, Академич Ц.Батбаяр, Америкийн Монгол судлалын төвийн суурин захирал М.Даваасүрэн болон хүрээлэнгийн удирдлага, судлаачид оролцож, эрдэмтний амьдрал, үйл ажиллагааны талаар хэлэлцүүлэг өрнүүллээ. Мөн энэ үеэр Монгол Улсын Үндэсний номын сантай хамтран Оуэн Латтиморын судалгааны бүтээлүүдээр үзэсгэлэн гаргаж, номын хандивын арга хэмжээг зохион байгуулж, “Интер ном” номын дэлгүүр шинэ номын танилцуулга хийсэн байна.
Энэхүү номын санг монголч эрдэмтний нэрээр нэрлэсэн нь ихээхэн утга учиртай үйл явдал байлаа. Тэрээр хүйтэн дайны он жилүүдэд монгол судлалын анхны суурийг тавьж, Монголын соёл иргэншил, түүх, антропологи, гадаад харилцааны чиглэлээр үнэ цэнтэй бүтээлүүд туурвин, Монголын геополитикийн судалгааны эхлэлийг тавьсан эрдэмтэн. Иймд түүний шинжлэх ухааны өвийг хүндэтгэн, нэрийг нь номын санд олгосон нь эрдэмтдийн үйл хэргийг алдаршуулсан ач холбогдолтой шийдвэр болж байна.
