НҮБ-ын Цөлжилттэй тэмцэх тухай конвенцын талуудын 17 дугаар бага хурал (COP17) ирэх наймдугаар сарын 17-28-ны өдрүүдэд Улаанбаатар хотод зохион байгуулагдана. Уг арга хэмжээг угтан НҮБ-ын Хөгжлийн хөтөлбөрийн “Уур амьсгалын Амлалт-2” төслийн дэмжлэгтэйгээр Монгол Улсын Их Сургууль “COP17” загвар хуралдааныг гуравдугаар сарын 04,05 өдрүүдэд зохион байгууллаа. Хуралдааны өмнө нийт 120 оюутан, залууст гурван модуль бүхий цахим сургалтыг зохион байгуулснаас 60 оролцогчийг загвар хуралдааны албан ёсны төлөөлөгчөөр сонгосон юм.
Залуусын дунд цөлжилт, газрын доройтол, уурамьсгалын өөрчлөлтийн эсрэг авах арга хэмжээ зэрэгсэдвээр хэлэлцүүлэг өрнүүлж, олон улсын хэмжээнд баримтлах бодлогын баримт бичиг боловсруулах зэрэг ур чадваруудыг эзэмшүүлэхэд чиглэсэн юм. Загвар хуралдааны үеэр залуус улс орнуудын удирдагчдыг төлөөлөн цөлжилт, газрын доройтлыг сааруулах, хүлэмжийн хийн ялгарлыг бууруулах, ногоон санхүүжилт болон технологийн шийдэл зэрэг тулгамдсан асуудлыг хөндөн шинэ санаа шийдлүүдийг дэвшүүлэв.
Хуралдааны төгсгөлд монгол орны өнцөг булан бүрийг төлөөлөн оролцсон залуус СОР17-д хүргэх монгол залуучуудын уриалгыг хэлэлцэн баталлаа.
Тэд шийдвэр гаргах түвшинд залуусын оролцоог бодитой болгох ажлын хүрээнд:
- Байгаль орчны бодлого боловсруулах, хэрэгжүүлэх бүх шатанд залуучуудын төлөөллийг албан ёсоор оролцуулах,
- Цөлжилт, газрын доройтлын эсрэг залуусын аливаа санаачлагыг дэмжин хэрэгжүүлэх,
- Цөлжилтийн эсрэг үйл ажиллагаанд жендэрийн эрх тэгш оролцоог хангаж, охид эмэгтэйчүүдийн санаачлагыг дэмжих, ажил хэрэг болгох,
Цөлжилтийн эсрэг инновац ба уламжлалт мэдлэгийг хослуулах зорилгын хүрээнд:
- Цөлжилтийн эсрэг үйл ажиллагаанд орчин үеийн дэвшилтэт технологийг нэвтрүүлэхэд залуу судлаачдыг дэмжин ажиллах,
- Монголчуудын бэлчээр ашиглах уламжлалт арга ухаан, нүүдэлчдийн соёлыг шинжлэх ухааны ололт амжилттай уялдуулан, олон улсын туршлага болгож түгээх,
- Уламжлалт мэдлэг болон хөдөө аж ахуйн технологи эзэмших, хэрэглэх боломж нөхцлөөр охид эмэгтэйчүүдийг дэмжих
Цөлжилт, газрын доройтлын тухай мэдлэг мэдээлэл түгээх, соён гэгээрүүлэх ажлын хүрээнд:
- Бүх шатны боловсролын байгууллагын хөтөлбөрт цөлжилт ба газрын доройтлын тухай агуулгыг оруулах,
- Олон нийтэд чиглэсэн нөлөөллийн аяныг эрчимжүүлж, цөлжилт, газрын доройтлын эсрэг үйл ажиллагаануудад залуучуудын оролцоог нэмэгдүүлэх,
- Хүн ам зүйн бүлгүүдэд цөлжилт, газрын доройтлын тухай мэдээллийн тэгш хүртээмжийг хангах,
- Олон улсын хамтын ажиллагаа, санхүүжилтийн шийдлийн хүрээнд Монгол Улсад хэрэгжиж буй цөлжилт, газрын доройтлын эсрэг үндэсний хөдөлгөөнийг дэмжиж, цөлжилтөд өртөмтгий бүс нутгийн залууст зориулсан “Ногоон санхүүжилт”-ийг бий болгохыг уриалсан юм. Загвар хуралдааны шилдэг багаар “Армен улс” баг, шилдэг оролцогчоор З.Анхзаяа тус тус шалгарлаа.
