Франц улсад засгийн газрын санаачилсан төсвийн таналт, хэмнэлтийн бодлогыг эсэргүүцсэн томоохон жагсаал Парис, Марсель, Нант зэрэг хотуудад үргэлжилсээр байна. Энэхүү жагсаалын улмаас сургууль, нийтийн тээвэр, бусад үйлчилгээнүүд хаагдаж жагсаал илүү өргөн хүрээг хамарсан байдалтай болсон байна.
Багш, эрүүл мэндийн ажилтан, тээвэр, эмийн сангийн үйлдвэрчний эвлэлүүд шинэ ерөнхий сайд Себастьян Лекорнуг төлөвлөгөөгөө цуцлахыг шаардан улс орон даяар ажил хаялт зохион байгуулжээ.
Жагсагчид эмнэлэг, сургууль зэрэг нийгмийн үйлчилгээнд зарцуулах төсвийг танаснаар чанар нь муудаж, иргэдийн эрүүл мэнд, боловсролд сөргөөр нөлөөлнө гэж үзэж байгаа юм. Мөн өмнөх засгийн газрын тэтгэврийн насыг 62-оос 64 болгож нэмэгдүүлсэн шийдвэр нь олон хүний эсэргүүцэлтэй тулгарч байсан бөгөөд энэхүү шинэчлэлийг цуцлахыг шаардаж байгаа нь энэ жагсаалын бас нэгэн гол шалтгаан болоод байна. Жагсаал тайван эхэлсэн ч улмаар жагсагчид цагдаа нартай мөргөлдөж, цагдаа нар нулимс асгаруулагч болон хүч хэрэглэж зарим жагсагчдыг баривчилсан тохиолдол гарчээ.
