МАН-ын урилгаар АН Хамтарсан засагт ороод найман сарын нүүрийг үзэж байна. Өчигдөр болсон АН-ын бүлгийн хурлын үеэр УИХ-ын гишүүн Ч.Лодойсамбууг ганцаарчилсан улс төрийн тоглолт хийж Засгийн газрыг огцруулах санал гаргасан нь буруу гэж зарим гишүүд нь шүүмжилсэн байна. Өөрийн албан бланк дээрээ гарын үсэг цуглуулж байгаагаа зарлаж, тэр зурна гэсэн үгүй гэсэн гээд хэвлэлээр багагүй гарч байсан билээ. Харин түүний акцыг хувийн тоглолт хийсэн, бүлгийн хурлаар хэлэлцүүлж нэгдсэн шийдвэр гаргах байсан гэж зарим гишүүд шүүмжилсэн бол зарим нь “Яагаад санал гаргаж болдоггүй юм. Харин санал гаргаад зохион байгуулалттайгаар хувь хүн, орон байр руу нь хүртэл дайрч байгаа нь эрх баригчдын зүгээс ардчиллыг хэврэгшүүлж байна. Тэд энэ аргадаа бүр илүү сурамгай боллоо” гэх зэргээр өмөөрсөн гэнэ. АН-ын бүлгийн нэлээд гишүүд дата анализид суурилсан бодлогын шийдвэрээс илүүтэй олон нийтийг сэтгэл хөдөлд автуулж тархи угаах аргачлалаар улс орны шийдвэрийг гаргадаг боллоо гэж шүүмжилжээ.
