Даваагийн Цогтбаатар хэмээх УИХ-ын гишүүнийг УИХ-д нь үлдээхээр тохиролцсон бололтой байна. Уг нь түүнийг гэм буруутай гэж үзсэн Дээд шүүхийн тогтоолыг гардуулсан цагаас УИХ-ын гишүүн бусад тооцно, Төрийн байгуулалтын байнгын хороо асуудлыг шийдвэрлэнэ гэж байв. Гэвч, Засагт намууд хамтарсан, Ерөнхий сайд саяхан хэвлэлд өгсөн ярилцлагадаа Л.Гантөмөр, Т. Доржханд нартай тун дориун гар нийлж ажиллаж байгаагаа тодотгосонтой холбоотой юу, Даваагийн Цогтбаатарыг УИХ-д үлдээх завшаан улс төрийн дээд хүрээндээ тохиргоотой болсон тал илтэд ажиглагдаж байна. Л.Гантөмөрт ч, Т. Доржхандад ч дахин нөхөн сонгууль хийж, цаг зав, зардал чирэгдэл барж, өрсөлдөж, өөнтөглөлцөж үзэх бодол үгүй, намууд хоорондоо “сэтгэлдээ юм хийлцэхгүй” байх төлөвтэй аж. Ингэснээр улс төрийн түвшин байдалд таатай ч , зарчим, хууль алдагдсаар л байна. Сая сар шинээр Д.Цогтбаатар малчин айлаар орж, дээр суун, дээж таллан, хар дээлээр гангаран ахин гурван жил алдалгүй УИХ-ын гишүүн байх хүний дүр төрх бэлхэнээ илэрхийлэн харагдсан нь энэ байж.
Б.ОРГИЛ
