УИХ-ын даргын санаачилгаар Монголбанк, Санхүүгийн зохицуулах хороо, Боловсролын ерөнхий газар, Хадгаламжийн даатгалын корпораци хамтран ахлах ангийн сурагчдад санхүүгийн боловсрол олгох “Level-UP” хөтөлбөрийг хэрэгжүүлж байгаа билээ. Тус хөтөлбөрийн нээлтийн үйл ажиллагааг Улаанбаатар хотод хоёрдугаар сарын 26-ны өдөр зохион байгуулж нийт 1200 сурагч оролцжээ.
“Level-UP” хөтөлбөр нь ахлах ангийн сурагчдад санхүүгийн суурь мэдлэг олгож, зүй зохистой хэрэглээний дадал хэвшил суулгах, мөнгөө зөв удирдах замаар санхүүгийн оновчтой шийдвэр гаргаж, эрсдэлийг үнэлэх чадвартай, хуримтлалтай иргэн болгон төлөвшүүлэх зорилготой юм. Улмаар энэхүү зорилгын хүрээнд нийслэлийн 6 дүүргийн 75 багш нарыг чадавхжуулан, бэлтгэсэн бөгөөд ирэх зургадугаар сар хүртэл 2790 гаруй сурагчийг хамруулах ажээ. Мөн Говь-Алтай, Ховд, Булган, Эрдэнэт, Увс, Завхан аймгийн 74 багш, 2210 сурагчид энэ хөтөлбөрт хамрагдах бөгөөд нийт 5000 гаруй сурагчдад хүрч ажиллахаар зорьж байгаа ажээ.
Нээлтийн үйл ажиллагаанд УИХ-ын дэд дарга Х.Булгантуяа, Монголбанкны Ерөнхийлөгч Б.Лхагвасүрэн, Санхүүгийн зохицуулах хорооны дарга Т.Жамбаажамц, УИХ-ын Тамгын газрын дэд дарга Ү.Амарбат болон Боловсролын ерөнхий газрын дарга Т.Ням-Очир нар оролцож, үг хэлсэн байна. Мөн сурагчид санхүүгийн мэдлэгээ уралдуулж, тэргүүн болон дэд байрт шалгарсан хоёр сурагчид 500,000 төгрөг, гутгаар байранд байрт шалгарсан сурагчид 300,000 төгрөгийн хадгаламж байршуулах эрхийн бичиг гардуулжээ. Үүнээс гадна 33 сурагчид Хадгаламжийн даатгалын корпорациас 50,000 төгрөгийн хадгаламжийн эрхийн бичиг, 20 сурагчид Санхүүгийн зохицуулах хорооноос хувьцаанд хөрөнгө оруулах 50,000 төгрөгийн эрхийн бичиг гардуулав.
