БНХАУ-ын Харбин хотноо Азийн 9 дэх удаагийн наадам өнөөдөр албан ёсоор эхэлж байгаа билээ. Энэ удаагийн наадамд биатлон, гүйлтийн цана, кёрлинг, уулын цана, уран гулгалт, снөүборд, хоккей, тэшүүр, шорт трейк, фристайл, цанаар авирах зургаан спортын 11 төрлийн 64 зай, ангилалд болох бөгөөд 34 орны 1275 тамирчин хүч сорих юм.
Манай улсаас дөрвөн спортын долоон төрөлд 35 тамирчин, 26 дасгалжуулагч, албаны төлөөлөгчөөс бүрдсэн баг Харбин хотод очжээ. Уг наадмыг Монголын спортын сэтгүүлчдийн холбооноос 10 гаруй сэтгүүлч сурвалжилж буй.
Өнөөдөр буюу /2025-02-07/-ны өдөр шорт трекийн эрэгтэй, эмэгтэй 1500 м зайн уралдаан болж байна. Уг тэмцээний эмэгтэйчүүдийн төрөлд Монголын багийн тугч Б.Гэрэлтуяа өрсөлдөж буй. Манай тамирчин хэсэгтээ БНСУ, Хятадын Хонгконг, Хятадын Тайвань, БНЭУ-ын шигшээ баг тамирчтай өрсөлдөж 2:38.674-н амжилтаар тэмцээнийг цааш үргэлжлүүлэх боломжтой болжээ.
