УИХ-ын чуулганаар хэлэлцэх асуудлын дараалал, товыг тогтоох эрх бүхий зөвлөл бол УИХ-ын даргын дэргэдэх зөвлөл юм.
УИХ-ын тухай хуульд зааснаар тус зөвлөлд парламентад бүлэгтэй улс төрийн намуудын төлөөллийг оруулдаг.
Энэ удаагийн парламент улс төрийн таван намаас бүрддэг бөгөөд хуульд заасны дагуу МАН, АН хоёр парламентад бүлэгтэй. Харин үлдсэн гурван нам буюу ХҮН нам, Үндэсний эвсэл, ИЗНН нь УИХ-д бүлэг байгуулах хэмжээний суудал аваагүй. Тиймээс уг зөвлөлд багтаагүй жижиг намын удирдлагууд болох ИЗНН-ын дарга Б.Батбаатар, Үндэсний эвслийн Н.Номтойбаяр нар энэхүү асуудлыг шүүмжлээд байсан юм.
Тэгвэл УИХ-ын дарга Д.Амарбаясгалан УИХ-д суудалтай ч бүлэггүй дарга нарыг тус зөвлөлд оруулахаар шийдвэрлэжээ. Ийнхүү ХҮН намын дарга Т.Доржханд, Үндэсний эвслийн дарга Н.Номтойбаяр, ИЗНН-ын дарга Б.Батбаатар нар УИХ-ын даргын зөвлөлд орж, мэдээлэлтэй танилцах боломжтой болж байна.