Шүүхийн шийдвэр гүйцэтгэх ерөнхий газрын харьяа Төв аймаг дахь Шүүхийн шийдвэр гүйцэтгэх газрын Цагдан хорих байр, албаны конторыг ашиглалтад оруулах нээлтийн үйл ажиллагаа өчигдөр /2024.08.22/ болжээ.
Тус арга хэмжээнд Шүүхийн шийдвэр гүйцэтгэх ерөнхий газрын Хяналт шалгалт, аюулгүй байдлын газрын дарга, хурандаа П.Батзориг, Төв аймгийн Иргэдийн Төлөөлөгчдийн Хурлын дарга Ц.Жамбалсүрэн, Засаг дарга Д.Мөнхбаатар, Төв аймаг дахь төрийн цэргийн болон хууль сахиулах байгууллагын удирдлагууд оролцлоо.
Барилгыг ашиглалтад оруулснаар сэжигтэн, яллагдагч, хоригдогчдын эрүүл, аюулгүй орчныг бүрдүүлж, жам ёсны эрхийг хангагдахын зэрэгцээ, алба хаагчдын ажлын байрны ая тухтай орчин нөхцөл сайжирч, тогтвор суурьшилтай ажиллах боломж бүрдэж байгаа юм.
Энэ үеэр Монгол Улсын Ерөнхийлөгч, Зэвсэгт хүчний Ерөнхий командлагчийн ивээл дор зохион байгуулагдаж буй “Ахлагчийн жил”, Шүүхийн шийдвэр гүйцэтгэх байгууллагаас дэвшүүлсэн “Байгууллагын соёлыг төлөвшүүлж, ахлагчийн манлайллыг дэмжих жил”-ийн хүрээнд Төв аймаг дахь Шүүхийн шийдвэр гүйцэтгэх газраас харуул хамгаалалтын ажилтан, дэд ахлагч Э.Доржнамжилд, Төв аймгийн Засаг даргын Тамгын газраас хэрэгжүүлж буй “Гэр” төслөөс ахмад ажилтан, бэлтгэл ахлах ахлагч Б.Цогтнаран нарт өргөө цагаан гэр гардууллаа.
Түүнчлэн эрхэлсэн ажилдаа идэвх зүтгэл, үр бүтээл гарган ажилласан зарим ахмад настан, алба хаагчдыг аймгийн болон Шүүхийн шийдвэр гүйцэтгэх байгууллагын шагналаар шагнаж, урамшуулсан юм.
