Дэлхийн хамгийн царай муутай нохойг шалгаруулах тэмцээн өнгөрсөн долоо хоногийн баасан гарагт /2024.06.21/ АНУ-ын Калифорни мужид явагдаж өнгөрчээ.
Тэмцээнд АНУ-ын Орегон мужийн оршин суугч Анн Льюисийн Вуайлд Тинг нэртэй Бээжин үүлдрийн нохой ялсан ажээ.
1988 оноос хойш зохион байгуулагдаж буй уг арга хэмжээ нь нохдыг шоолох бус харин дэлхий дахинд тэднийг хөөрхөн гэдгийг харуулах зорилготой гэж албан ёсны вебсайт дээрээ бичсэн байна.
Тэмцээний ялагч болсон Вуайлд Тинг 5 мянган ам.доллар болон Нью-Йорк хот руу аялах эрх хожсон байна. Найман настай Вуайлд Тинг тус тэмцээнд таван удаа оролцож, сүүлийн гурван жил дараалан хоёрдугаар байрт орсон юм.
Энэ жилийн арга хэмжээнд шүүгчээр оролцсон Фиона Ма тэрхүү Бээжин үүлдрийн нохой бууж өгөлгүй олон удаа оролцсоныхоо хариуд хожиж чадлаа гэж хэлжээ.
Тэрбээр “Associated Press” агентлагт “Тэмцээнд ялалгүй үргэлж хоёрт орж ирсэн нь бидний сэтгэлийг хөдөлгөсөн гэж бодож байна. Тэр үнэхээр ялах эрхтэй байсан” гэжээ.
