Нийслэлийн Засаг даргын захирамжаар үерийн хамгаалалтын шугам сүлжээ, барилга байгууламжийн ажлын тендерийг нээлттэй сонгон шалгаруулсан.
“Билгүүн Монгол констракшн” ХХК Сэлбэ голын голдирлыг өөрчлөн барьсан “S’Outlet” дэлгүүрийн буулгасан талбай орчимд үерийн түшиц хана барьж эхэллээ.
Нийслэлийн Засаг дарга бөгөөд Улаанбаатар хотын захирагч Х.Нямбаатар “Голын сав дагуу сүүлийн 20 жилд хууль бусаар газар олгож байсны тод жишээ Сүхбаатар, Баянзүрх дүүргийн нутаг дэвсгэрт барьсан S’Outlet худалдааны төв гэдгийг онцлоод, Сэлбэ голын урсцыг 3.5 метр хүрэхгүй болтол нь боомилж, барилга барьснаар өнгөрсөн зун үерлэсэн. Иймд ААН-үүдтэй хэлэлцээр хийж, худалдааны төвийг буулгасан тус газарт 1.5 км урт үерийн даланг барихаар болсон. Үерийн даланг өргөсгөх, бетоноор бэхжүүлэх, голын урсцыг нэмэх, ойр орчмыг тохижуулна” гэв.
Сэлбэ голын голдирлын урсацыг нэмэгдүүлэх 1,5 км урт 4-4,5 метр өндөр төмөр бетонон хийцтэй үерийн далан хийх юм. Уг далан нь Натурын гүүрнээс урд талын төмөр замын гарам хүртэл үргэлжлэх бөгөөд ирэх найдугаар сарын 20-нд улсын комисст хүлээлгэх өгөх юм.
“Билгүүн Монгол констракшн” ХХК-ийн төслийн удирдагч Р.Дамба “Манай компани түшиц хана, далан хийх олон жилийн туршлагатай. Гурван төрлийн 17 техник оруулж S’Outlet” дэлгүүрийн буулгасан талбай орчимд үерийн түшиц хана барина” хэмээлээ.
