Хан-Уул дүүрэгт байрлах зэвсэгт хүчний ….. дугаар ангийн байранд хугацаат цэргийн алба хаагч нас барсан харамсалтай хэрэг гарсан. Энэ үеэр тухайн цэргийн ангийн дотоод орчин нөхцөл нь олон нийтэд ил болсон. Үүнтэй холбоотойгоор цэргийн ангиудын орчин нөхцөлийг сайжруулах, засварлах шаардлагатай гэдэгт төр засгийн зүгээс анхаарлаа хандуулж эхэлсэн аж.
Батлан хамгаалахын сайд, зэвсэгт хүчний Жанжин штабын даргын шийдвэрээр зэвсэгт хүчний нэгтгэл, ангиуд хугацаат цэргийн алба хаагчдын орчин нөхцөл, цэргийн байр, амрах байрыг бүрэн хэмжээнд засварлан шинэчилж, ор, дэр, хөнжлийг нь шинээр хангаж, түрүүч, байлдагч бүрийг хувийн хэрэгцээний зүйлсээ хадгалах шүүгээтэй болгохоор болсон байна.
Одоогоор 29 цэргийн байрны барилгыг засварлаж байгаа бөгөөд гадна засвар, дотор засвар, шугам сүлжээ, дээвэр, шүршүүр, бие засах өрөө зэрэг бүрэн хэмжээний урсгал засварыг хийж байна. Урсгал засварыг өнгөрсөн сарын 15-наас эхлүүлсэн ба зуны улиралдаа багтаан дуусгахаар зэвсэгт хүчний нэгтгэл, ангийн алба хаагчид ажиллаж байгаа аж.
Цэргийн байрны барилгын засварын ажил дуусахтай зэрэгцүүлэн шинээр хангалтаар нийлүүлэх ор, дэр, хөнжил, шүүгээг ЗХЖШ-аас нэгтгэл, ангиудад тээвэрлэн хүргэхээр төлөвлөөд байна.
