Ардчилсан Залуучуудын Холбооноос /АЗХ/ 2024 оны УИХ-ын сонгуультай холбоотой асуудлаар Ардчилсан намын дарга Л.Гантөмөрт хүсэлт хүргүүлэх талаар мэдээлэл өглөө. Тодруулбал, энэ удаагийн УИХ-ын сонгуулийн жагсаалтад залуучуудыг ихээр дэвшүүлэх буюу нэр дэвшигчдийн 50-аас дээш хувийг нэр цэвэр, шинэ залуучуудаар бүрдүүлэх хүсэлт тавьж байгаа аж.
Мөн эмэгтэйчүүд, иргэний нийгмийн төлөөллүүд болон улс төрийн туршлагатай хүмүүсийг нэр дэвшүүлэх уриалга гаргалаа.
АЗХ нь 21 аймаг, 9 дүүрэг, 330 сум, 204 хороонд салбар нэгжтэй байгууллага юм. Тус холбооны 30 нэгжээс хүсэлт ирүүлсний дагуу АЗХ-ны гүйцэтгэх зөвлөл тогтоол гаргасан байна.
Тус тогтоолд Ардчилсан намаас УИХ-ын сонгуульд хувь тэнцүүлэн төлөөлөх 48 нэр дэвшигчийн нэрсийн жагсаалтын эхний аравт АЗХ-ны Ерөнхийлөгч Б.Ган-Очирыг оруулах, АЗХ-ны хоёр төлөөллийг жагсаалтын 11-20 дугаарт, таван төлөөллийг 21-48 дугаарт тус тус оруулах саналыг дэмжихийг дурджээ.
