Замын-Үүдийн Гаалийн газар он гарсаар 130 гаруй гаалийн зөрчил илрүүлж, хянан шийдвэрлэжээ. Өнгөрсөн 2023 онд нийт 850 гаруй зөрчил, хэргийг хянан шийдвэрлэсэн байна. Иргэд ихэвчлэн байгалийн чулууг их хэмжээгээр хил гаргах болон хаяг шошго нь тодорхой бус архи, согтууруулах ундаа гаалиар гаргах зэрэг зөрчил гаргадаг байна.
Замын-Үүдийн ачаа тээврийн цогцолбор дээр үйлчлүүлж байгаа иргэд хүний дайвар ихээр авч гарахыг оролддог байна. Мөн гарал үүсэл нь тодорхойгүй архи, бусад хүнсний бүтээгдэхүүн байвал буцааж гаргах эсвэл улсын орлого болгож устгах ажил гардаг. Тэгэхээр иргэд анхнаасаа мэдсээр байж хууль зөрчихгүй байх нь чухал. Хориотой, хязгаарлалттай бараа, бүтээгдэхүүн болоод дайвар ачаанд гаалийн байгууллагаас онцгой хяналт тавьж байгаа. Тухайлбал, 2024 оны 1-3 дугаар сард бүх төрлийн гарал үүсэл нь тодорхойгүй, хаяг шошгогүй архийг хураах арга хэмжээ авсан хэмээн Замын-Үүд дэх Гаалийн газрын зөрчилтэй тэмцэх албаны дарга н.Ундрах ярилаа.
