Зудын нөхцөл байдал хүндэрч буйтай холбоотойгоор Засгийн газрын ээлжит хуралдаанаар хөдөө, орон нутгийн сурагчдын улирлын амралтад өөрчлөлт оруулах тухай яригдсан байна. Харин Улаанбаатар хот болон аймгийн төвийн сурагчдын амралтад өөрчлөлт орохгүй.
Засгийн газрын ээлжит хуралдаан хоёрдугаар сарын 28-нд болсон бөгөөд хаваржилт хүндэрч буйтай холбогдуулан Засгийн газрын хуралдаанд Боловсрол, шинжлэх ухааны сайд Л.Энх-Амгалан мэдээлэл хийлээ.
Уг мэдээллийг үндэслэн Засгийн газрын хуралдаанаас хаваржилт хүндэрсэн бүс нутагт аймгийн Засаг даргын саналыг үндэслэн ерөнхий боловсролын сургуулийн III улирлын хичээл, сургалтын үйл ажиллагаанд шаардлагатай зохицуулалт хийж, сурагчдын улирлын амралтын хугацааг нэмэгдүүлэх боломжтой эсэхийг судалж шийдвэрлэхийг салбарын сайд Л.Энх-Амгаланд даалгалаа. Цаашид орон нутагт сурагчдын амралтыг цагаан сарын баяр болон тухайн бүс нутагт мал төллөх хугацаанаас хамааруулан хичээлийн жилийн бүтцийг хот, орон нутагт ялгаатай тогтоох нь зүйтэй гэсэн юм.
