Иргэдийн дунд тахианы өндөг нь өнгөнөөсөө шалтгаалан шим тэжээлийн хувьд ялгаатай байдаг. Бор өндөг илүү уураглаг гэх мэт ойлголтууд бий. Энэхүү асуултад мэргэжлийн хүн дараах хариултыг өгч байна.
Өндөгний гадна талын хальсны өнгө нь бор, цагаан гэх мэт олон янз байх боломжтой. Өнгө нь өндөгний доторх шим тэжээлтэй ямар нэгэн холбоо байхгүй бөгөөд өндөгний өнгө нь тухайн тахианы генетикээс шалтгаалдаг байна. Ямар тахиа цагаан өндөг гаргадаг, ямар тахиа бор өндөг гаргадаг гэдгийг тахиагаа гаднаас нь ажиглаад ялгах боломжтой . Ихэвчлэн чихний доод талын хэсэг нь цагаан байвал цагаан өндөг, улаан байвал бор өндөг гарна гэж ойлгож болно.
Тахианы өндөг нь жижиг, том, дотроо 2 шартай эсвэл бүр огт шаргүй гэх мэт олон янз гарч ирэх боломжтой байдаг. Мөн огт хальсгүй эсвэл давхар хальстай гэх мэт гарч ирэх тохиолдлууд бий. Ихэвчлэн дөнгөж өндөглөж эхэлж байгаа залуу тахиануудад ийм алдаа гарах тохиолдлууд байдаг ба мөн айж цочих гэх мэтээс шалтгаалдаг байна. Жишээ нь залуу тахиа байх тусмаа өндөгнийх нь гадна талын бүрхүүл илүү хатуу, бат бэх, хэмжээ жижиг байдаг бол хөгшрөх тусам том, гадна талынх нь бүрхүүл илүү нимгэрч байдаг. Тийм учраас зарим үед хоол хүнсэнд нь кальцитай хоол хүнсийг нэмэх шаардлагатай байдаг байна.
Эх сурвалж: Хүнсний инженер Э. Мөнхнасан
