Альберт Эйнштейний нэрэмжит анагаах ухааны сургуульд профессор Рут Готтесман нэг тэрбум доллар хандивлаж, мөнгийг нь элсэх оюутнуудын сургалтын төлбөрт зарцуулахыг хүссэн байна.
Профессор Рут Готтесман эмч нарыг оюутны зээлгүйгээр карьер эхлүүлэх, анагаахын сургуульд зөвхөн санхүүгийн чадамжтай оюутнууд элсдэггүй байгаасай хэмээн хүсэж энэхүү хандивыг өргөжээ. Тэрээр өдгөө 93 настай бөгөөд энэхүү олон сая долларын хөрөнгийг өөрийн нөхөр Дэвид Готтесманаас өвлөн авчээ. Түүний нөхөр 2022 онд нас барсан бөгөөд хөрөнгийг нь зөв зүйлд зарцуулахыг хүсэж эхнэртээ өвлүүлжээ.
Профессор Рут Готтесман тус их сургуульд олон жил багшлахдаа оюутнууд сургуулиа төгсөх хүртэл хамгийн багадаа 200,000 ам долларын өрөнд ордог болохыг анзаарчээ. Тиймээс тус их сургуульд оюутнуудын сургалтын төлбөрийг тэглэх нөхцөлөөр тэрбум долларыг хандивлажээ. Энэ нь АНУ-ын анагаахын сургуульд өгсөн хамгийн том хандивуудын нэг бөгөөд Нью-Йоркийн хамгийн ядуу, амьдралын боломж тааруу хэсэг амьдардаг Бронкс дүүрэгт өгч буйгаараа онцлог юм.
