“The Earthshot Prize” буюу “Дэлхийн Цохилт Шагнал” (The Earthshot Prize) нь байгаль орчны томоохон асуудлуудыг шийдвэрлэх шинэлэг, тогтвортой шийдлүүдийг олж, дэмжих зорилготой дэлхийн хэмжээний нэр хүндтэй арга хэмжээ юм.
Үүнийг Уэльсийн хунтайж Уильям 2020 онд санаачласан бөгөөд АНУ-ын Ерөнхийлөгч Жон Кеннедигийн “Moonshot” (Сар руу хийх нислэг)-ын төслөөс урам авч, дэлхийн байгаль орчинд тулгамдаж буй асуудлуудыг шийдвэрлэхэд “цохилт” өгөх зорилготой санаачилсан байна.
Шагналын таван үндсэн ангилал буюу “Таван Дэлхийн Цохилт” (Five Earthshots) хуваан олгодог бөгөөд үүнд:
- Байгалийг хамгаалах ба сэргээх (Protect and Restore Nature)
- Агаарыг цэвэрлэх (Clean Our Air)
- Далайг сэргээх (Revive Our Oceans)
- Хог хаягдалгүй ертөнцийг бий болгох (Build a Waste-Free World)
- Уур амьсгалыг засах (Fix Our Climate)
Энэ жилийн Earthshot шагналын ялагчдын тоонд халуун орны ойг сэргээх төсөл болон дэлхийн далайн гэрээний санаачилга багтжээ. Лхагва гарагт Бразилд болсон шагнал гардуулах ёслолын үеэр нэрлэгдсэн ялагчдад уур амьсгалыг сэргээх төслүүдээ өргөжүүлэхэд зориулж тус бүр 1 сая фунт стерлингийг олгох юм.
Бразилийн хөлбөмбөгийн домогт Кафу, Олимпийн тамирчин Ребека Андраде, Формула 1-ийн жолооч асан Себастьян Феттель нар хөтлөгчдийн дунд байсан бөгөөд поп одод Кайли Миноуг, Шон Мендес нар Рио-де-Жанейрогийн музейд маргааш нь болсон ёслолын ажиллагаанд оролцож ая дуугаа өргөсөн байна.
Энэхүү шагнал нь 2021- 2030 он хүртэл жил бүр олгогдох бөгөөд дэлхийн өнцөг булан бүрээс шийдэл гаргаж буй хувь хүн, баг, байгууллагыг шалгаруулдаг юм. Мөн энэхүү арга хэмжээ нь зөвхөн мөнгөн шагнал олгоод зогсохгүй, ялагч болон шилдэгт үлдсэн оролцогчдод санхүүжүүлэгч, бизнес, засгийн газрын байгууллагуудыг холбож өгч дэмжлэг үзүүлж, тэдний шийдлүүдийг дэлхий даяар түгээн дэлгэрүүлэхэд тусалдаг.
