БНСУ-ын онгоцны буудал дээр 2 ойтой хүү идэх хоолгүй саатуулагдаад хоёр хонож буй талаар ээж нь цахим орчинд бичжээ.
Хүүгийн ээж “Манай хүү 2 ойтой. Бид хоёр виз аваад хоёулаа анх удаа Сөүл рүү аялах гээд иртэл утас булааж авч үзээд юу ч ойлгохгүй нялх хүүхдийг идэх юмгүй хоёр хоног нохой, муурнаас доор байлгаж, хүүхэд идэх юу ч өгөхгүй, хоолгүй, халуун усгүй, зориулалтын сүү, нухашгүй байлгаж байна шүү дээ. Шөнөжин чарлаж уйлж хонолоо. Энэ хүүхэд шоронгийн хоригдол уу? Гэмт хэрэгтэн үү? Ядах нь ээ хүүхдэд идэх хоол өгөөч гэсэн тийм зүйл байхгүй, өгөхгүй гэсэн. Гар ачаандаа бэлдсэн жаахан юмаар болгоод байтал энэ хүүхэд хоолойгоо тасартал уйлж байгаад унтлаа. Доторх “GS25″-д хүүхэд идэж чадах юм байдаггүй юм байна. Өнөөдөр буцах байх гээд онгоц хүлээгээд байж байна даа” хэмээжээ.
2 настай хүүгийн ямархуу байдалтай байгааг харсан УИХ-ын гишүүн Б.Бат-Эрдэнэ “Ийм зүйлийг бол тэвчихгүй. Үүний араас явна. Арай дэндэж байна. Бид иргэн бүрээ хамгаалдаг байх ёстой. Б.Батцэцэг сайд анхаарч хатуу арга хэмжээ авч ажилламаар байна” хэмээсэн байна.
