Нарансэвстэйн боомтыг дахин сэргээх, нээх тухай заалт Засгийн газрын үйл ажиллагааны хөтөлбөрт орж ирснийг олон нийт эсэргүүцэж, “Д Парламент” платформ дээр маш богино хугацаанд 33 мянган хүний гарын үсэг цугларсан. Улмаар Төрийн байгуулалтын байнгын хороон дээр ажлын хэсэг байгуулж ажиллах болсон юм. Уг ажлын хэсэг албан ёсны хариугаа өгөх хуулийн хугацаа буюу 90 хоног өнгөрөөд удлаа. Тэгвэл эрдэмтэн судлаач, орон нутгийн иргэдийн оролцоотой “Алтайн өвөр говио хамгаалъя” нэртэй хэлэцүүлэг энэ ням гарагт болох гэж байна. Зохион байгуулагчид “Эрдмийн их сургууль”-ийн байранд болох энэхүү хэлэлцүүлэгт Говь-Алтай аймгийн Алтай, Цогт, Эрдэнэ сум, Баянхонгор аймгийн Баян Өндөр, Шинэжинст сумдуудын ард иргэд болон хууль тогтоогчид, байгаль дэлхийдээ ээлтэй бүхий л хүмүүсийг идэвхтэй оролцохыг урьж байгаа аж. Алтайн өвөр говь нь дэлхийд цор ганц говь, цөлийн эко систем бөгөөд Монгол орны заган ойн сан тэнд байхаас гадна мазаалай, хавтгай, хулан зэрэг нэн ховор улаан номд орсон зэрлэг амьтад тэнд амьдардаг билээ.
