Зоонозын өвчин судлалын үндэсний төвөөс баасан гарагт /2025.04.25/ “Зоонозын халдварт өвчний тэргүүлэх чиглэл тодорхойлох хэлэлцүүлэг”-ийг зохион байгуулна. Уг хэлэлцүүлэгт нийслэл болон 14 аймгийн Зоонозын өвчин судлалын төвийн удирдлага, эмч мэргэжилтнүүд, биологич нар оролцож, Монгол улсын зоонозын салбарын хөгжлийн цаашдын чиг хандлага, зоонозын халдварт өвчний тэргүүлэх чиглэлийг тодорхойлох юм байна. Хэлэлцүүлэг Эрүүл мэндийн яаманд зохион байгуулагдана.
Хэлэлцүүлэг нь зоонозын халдварт өвчний тэргүүлэх өвчний жагсаалтаар бүсчилсэн тандалт судалгааг өргөжүүлэх тандалт судалгаа, шинжилгээ хийх ажлын тодотгол, санал боловсруулах бүлгийн ярилцлага, дадлага ажлаар явагдана.
Монгол Улс, ОХУ, БНХАУ-тай хилийн бүс дагуу байгалийн голомтын тандалт судалгааг хийж тарваган тахал өвчний байгалийн голомтын идэвхжил ”өндөр” мэрэгч, туулай хэлбэртнээс тарваган тахлын эсрэг бие, мэрэгч амьтдын 57.9%-д тарваган тахал түүнтэй хам тохиолдох өвчний халдварлалттай байгааг тодорхойлж, хачигт боррелиоз, хачигт риккетсиоз, листериоз өвчний үүсгэгч илрүүлээд байна.
Нөгөөтэйгүүр малын дунд арьс товруутах өвчин, фасциолиоз, листер, адууны ям зэрэг шинэ зоонозын халдварт өвчнүүд бүртгэгдэж, хумхаа, бэтэг, ям, лейшманиозын хүний өвчлөлийн тохиолдол шинээр оношилогдон бүртгэгдэх болсон. Энэ нь Монгол орны бүсийн онцлогт тохируулан зоонозын халдварт өвчний тэргүүлэх чиглэлийн өвчний жагсаалтийг гаргаж, тэргүүлэх өвчинд чиглэсэн оношилгооны чадавхийг сайжруулах, бэхжүүлэх хэрэгцээ шаардлага зайлашгүй тулгараад байгааг харуулж байна. Тиймээс зоонозын халдварт өвчний оношилгооны чадавхийг бэхжүүлэх зорилгоор нийслэл, аймгийн Зоонозын өвчин судлалын төвүүдэд молекул биологийн лабораторийн иж бүрэн тоног төхөөрөмжүүдээр хангаж, мэргэжилтнүүдийг сургаж хүний нөөцийг чадавхжуулан зоонозын халдварт өвчний оношилгоо, шинжилгээг орон нутгийн түвшинд цаг алдалгүй хийж байна.
Монгол Улс нь өргөн уудам газар нутагтай, бүх төрлийн агуулагч амьтадтай. Хүн амын 40 орчим хувь нь мал аж ахуй эрхэлдэг. Хүн амаасаа 20 дахин их малтай зэрэг нь зоонозын халдварт өвчний “өндөр эрсдэл”-тэй орон болохыг харуулж байна.
