АНУ-ын Хүнс, эмийн чанарын хяналтын алба (FDA) түүхэнд анх удаа гений өөрчлөлттэй гахайн элгийг хүнд шилжүүлэн суулгах эмнэл зүйн туршилтыг зөвшөөрчээ.
Гахайн элгийг сүүлийн шатанд орсон элэгний дутагдалтай өвчтөний амийг түр хугацаанд тэтгэхэд ашиглахаар болжээ. Туршилтад 10-70 настай дөрвөн хүн оролцох аж. 72 цагийн турш гахайн элгийг залгаж, цусан дахь хорыг шүүх юм байна. Ингэхдээ 69 төрлийн гений өөрчлөлт хийсэн гахайн элгийг ашиглах бөгөөд туршилт амжилттай болбол оролцогчдын тоог 20 болгож нэмэхээр төлөвлөжээ.
Туршилт амжилттай болбол анагаах ухааны салбарт том үсрэлт болно гэж үзэж байна.
Өнөөдөр элэгний хурц дутагдлаас үүдэлтэй нас баралт 50 хувьтай байдаг аж. АНУ-д жилд 1.5 мянган хүн эрхтэн шилжүүлэн суулгах ээлжээ хүлээх үедээ нас бардаг байна. Сүүлийн хоёр жилд АНУ болон Хятадад нийт зургаан өвчтөнд гений өөрчлөлттэй зүрх, бөөр шилжүүлэн суулгах мэс засал хийлгэжээ. Тэд хамгийн удаандаа хэдэн сар амьд явсан байна.
