Ирэх дөрөвдүгээр сарын 1-ний өдрөөс эхлэн хөдөлмөрийн хөлсний доод хэмжээ өмнөх үеийнхээс 20 хувиар буюу одоогийн 660 мянган төгрөг 792 мянга болж нэмэгдэхээр болсон.
Ингэснээр сайн дурын даатгуулагчдын төлбөл зохих хэмжээнд өөрчлөлт орох юм. Тухайлбал одоогийн хөдөлмөрийн хөлсний доод хэмжээгээр тооцож сайн дурын даатгал төлж байгаа иргэн 89100 төгрөг төлдөг байсан бол дөрөвдүгээр сарын 1-ээс хойш энэ дүн 106.920 төгрөг болж нэмэгдэх юм.
Энэ нь сайн дурын даатгуулагчдын шимтгэлийн 13.5 хувьд өөрчлөлт ороогүй хэвээр. Сайн дурын даатгуулагч орлогоо өөрөө тодорхойлж шимтгэлээ төлөх бөгөөд хөдөлмөрийн хөлсний доод хэмжээнээс дээш байх ёстой гэж хуульд заасан байдаг.
Эрүүл мэндийн даатгалын тухайд, иргэд хөдөлмөрийн хөлсний доод хэмжээний 2 хувиар буюу 13200 төгрөг төлдөг бол 4-р сарын 1-ээс хойш хөдөлмөрийн хөлсний доод хэмжээний 2 хувь буюу 15840 төгрөг төлнө.
Өнгөрсөн оны 10-р сард Гэр бүл, нийгмийн хамгаалал хөдөлмөрийн яам, Монголын Үйлдвэрчний эвлэлийн холбоо, Монголын ажил олгогч, эздийн холбоодын хамтарсан Хөдөлмөр, нийгмийн түншлэлийн үндэсний хорооны хурлаар ирэх 2026 онд хөдөлмөрийн хөлсний доод хэмжээг 1 сая төгрөгт хүргэх саналыг гаргасан бөгөөд одоогийн байдлаар албан ёсоор уг санал эцэслэгдээгүй байна.
