Төв банкнуудын алт худалдан авалт өндөр байгаа нь үнийн өсөлтөд түлхэц болж байна
Алтны үнэ унц нь 3000 ам.доллар даваад буй энэ үед дотоодын алт олборлогч компаниудын хувьцааны ханш эрчимтэй өсөөд байна. Тухайлбал: Торонтогийн Хөрөнгийн биржид бүртгэлтэй “Steppe Gold”-ийн хувьцааны ханш энэ он гарсаар 17.2 хувиар өслөө.
Харин энэ онд анхны алтаа гарган авахаар зорьж буй Торонто, Монголын Хөрөнгийн биржид давхар бүртгэлтэй “Erdene Resource Development” компанийн хувьцааны ханш 44 орчим хувиар өссөн байна.
Түүнчлэн дэлхийд алт олборлолтоор тэргүүлэгч “Newmont” болон “Barrick Gold” компанийн хувьцааны ханш энэ хугацаанд 20 орчим хувиар өсөөд байгаа юм.
Хөрөнгө оруулалтын банкнууд алтны үнэ өсөлтөө хадгалах төсөөлөл танилцуулж байгаа нь эдгээр компанийн санхүүгийн тайланд эергээр тусаж, улмаар хувьцааны ханш нь алтны үнийг даган өсөх боломжтой гэж таамаглаж байна.
Үүнээс гадна алтны үнэ өндөр байгаа ч Төв банкнуудын худалдан авалт эрчээ хадгалсаар байгааг Дэлхийн алтны зөвлөлийн дата харууллаа. Худалдан авалтаар тэргүүлэгч БНХАУ-ын Төв банкны хувьд сүүлийн дөрвөн сар дараалан алт худалдан авч, нийт нөөц нь 73.6 сая унц болоод байгаа аж.
“АНУ-ын бодлогын тодорхойгүй байдал нь алтны эрэлт өсөхөд нөлөөлж байгаатай зэрэгцээд Төв банкнуудын худалдан авалт өндөр хэвээр байх төлөвтэй” гэж “Goldman Sachs”-ийн шинжээчид онцолж байна.
via Bloombergtv.mn
