Ээж дүү нар нь сайжруулсан түлшний угаарын хийд хордож амиа алдсан харамсалтай үйл явдлын талаар ганцаараа үлдсэн хүү хэвлэл мэдээллийнхэнд хандлаа.
Энэ оны нэгдүгээр сарын 23-24-нийг шилжих шөнө Баянгол дүүргийн 22-р хороонд амьдардаг гэр бүлийн 6 хүн угаартаж нас барсан гэх харамсалтай үйл явдал болсон юм. Айлын том хүүг цэрэгт байхад энэ хүндхэн мэдээ ирснээр гунигт мэдээ, хоосон гэр хоёр түүнийг угтав.
Монголын төр “Утааны сонсгол”-ын хэлэлцүүлэг хийхдээ энэ харамсалтай явдлыг нэг ч дурдсангүй. Төрийг төлөөлж хэн ч энэ хүүгээс уучлал гуйсангүй. Утааны эсрэг хэсэг олон арга хэмжээнийх нь нэг нь энэ сайжруулсан түлш. Гал түлж, гэрээ дулаацуулах гэсэн жирийн нэг иргэний өдөр ийн дуусаад байвал энэ шийдэл биш шийтгэл болж байна гэсэн үг. Яагаад өнөөг хэр сайжруулсан түлшний угаарын хийгээс болж жирийн монгол иргэд амиа алдсаар байна вэ.
Эргээд хүний амь яригдах энэ ноцтой асуудлууд дээр иргэд рүү бурууг нь чихээд өнгөрөөдөг. Гэтэл өнөөдрийг хүртэл сайжруулсан түлш, угаарын хийн хордлогын улмаас хүмүүс амиа алдаж байгаа нь зогсохгүй хэвээр. Хэдэн хүний амиар бид “утаа багассан” нэртэй Улаанбаатарт угаартаж амьдрах ёстой вэ.
Төрийн буруу бодлогоос болж хохирсон иргэнийхээ өмнө бөхийдөг төртэй баймаар байна.
