Хөвсгөл аймгийн Улаан-Уул сумын төвөөс зүүн тийш 18 км-т орших Оргихын булаг буюу ижий булгийг олон иргэн зорин очдог болжээ.
Оргихын булгийн ус нь зуны улиралд маш хүйтэн байдаг бол өвөлдөө -50 хэмд хөлддөггүй урсаж байдаг онцлогтой юм.
Энэ булаг тахилгат Баян уулын баруун дээд талд Нарийн уулын өвөр хормойгоос эх авдаг бөгөөд 800 метр орчим урсаж Багтагын голд цутгадаг аж.
Булгийн хажууд мөнх ногоон гацуур, хуш, шинэс зэрэг олон зүйлийн мод, бут ургадаг үзэсгэлэнтэй газар юм.
Оргихын булгийн дэргэд эхийн тухай дуу дуулбал ус дээш урсан оргилдог тул нутгийн иргэд “Ижий булаг” гэж нэрлэдэг болжээ.
Оргихын булгийг зоривол Хөвсгөл аймгийн Улаан-Уул сумаас 18 км-т, Мөрөн хотоос 198 км-т, Улаанбаатар хотоос 1000 орчим км-т байдаг.
