Өнгөрсөн арваннэгдүгээр сарын 30-ны /2024.11.30/ өдөр Кёнги мужийн Ансон хотын бордооны үйлдвэрийн чингэлэгт гал гарсны улмаас нэг хүн амь насаа алдсан харамсалтай хэрэг гарсан. Чингэлэгт шатаж амь насаа алдсан хүнийг хэн болохыг тогтоогоогүй талаар тус улсын цагдаагийн газраас мэдээлж байсан. Гэвч шалгалтын явцад амиа алдсан хүн нь 20 гаруй насны Монгол Улсын иргэн А гэгч болох нь тогтоогдсон талаар Кёнги Ансон хотын цагдаагийн хэлтсээс өчигдөр /2024.12.01/ мэдэгдлээ.
Шатсан чингэлгийг тухайн үйлдвэр ажилчдын байр болгон ашиглаж байжээ. Урьдчилсан байдлаар галыг цахилгааны залгуураас гарсан гэж үзэж байгаа бөгөөд галын жинхэнэ шалтгааныг шалгаж байгаа аж. Мөн гал гарах үед хэргийн газар байсан гэх хохирогч А-гийн найз 20 гаруй насны монгол эрэгтэй Б-г тус улсын цагдаагийн газраас эрэн сурвалжилж байгаа юм.
Дээрх хэргийн хувьд тус үйлдвэр ажилчдаа чингэлэгт байрлуулж байсан нь ажилчдын тав тухыг хангаагүй, мөн чингэлэгт хүн амьдруулахдаа аюулгүй байдлыг нь хангаагүйн үүднээс гал гарсан нь хөдөлмөрийн аюулгүй байдлыг ноцтой зөрчсөн байдал болох аж. Гэвч уг асуудал дээр тус компанийг Хөдөлмөрийн аюулгүй байдлын хуулиар шалгаагүй байгаа бөгөөд зөвхөн тус хэргийн газраас зугтсан гэх монгол иргэнийг л эрэн хайх ажлыг үргэлжлүүлж байна.
