Өчигдөр буюу мягмар гарагт Лондон хотоос Сингапурын чиглэлд нисэж байсан Singapore Airlines компанийн нисэх онгоц агаарт хүчтэй донсолсны улмаас нэг хүн амиа алдаж, 71 хүн бэртсэн байна.
Тус онгоцонд 211 зорчигч, нисэх багийн 18 гишүүнтэй зорчиж байсан ба Boeing 777-300ER онгоц Мьянмарын нутаг дээгүүр нисэж байх үед уг осол гарсан байна. Тайландын нийслэл Бангкокт ослын буулт хийсний дараа бэртсэн зорчигчдод эмнэлгийн тусламж үзүүлжээ.
FlightRadar24 сайтын нислэгийн мэдээллээс үзвэл онгоц газраас 11,000 метрийн өндөрт нисэж явах үед агаарын хүчтэй урсгалд орж, огцом доош унасны дараа огцом хөөрч, дараа нь дахин доош унажээ. Энэ донсолгоо нийтдээ 90 секунд орчим хугацаанд үргэлжилсэн байна.
