38 зорчигчтой автобус ачааны автомашинтай мөргөлдсөн ноцтой осол гуравдугаар сарын 29-ний өдөр 10:01 цаг орчимд Төв аймгийн замд гарчээ.
Ослын дуудлагаар Төв аймгийн Онцгой байдлын газрын Эрэн хайх аврах, салбарын алба хаагчдыг очиход Өмнөговь аймгаас Улаанбаатар хотын чиглэлд зорчиж явсан “ФАВ СА4250″ загварын зүтгүүр, Улаанбаатар хотоос Өмнөговь аймгийн чиглэлд 38 ажилтанг тээвэрлэж явсан “Хьюндай юниверс” загварын автобустай мөргөлдсөн байжээ.
Ослын улмаас гэмтэж бэртсэн хүмүүсийг Төв аймгийн Нэгдсэн эмнэлэгт хүргэсэн байна. Эмнэлэгт хүргэгдсэн зорчигчдын 18 иргэний биеийн байдал хүнд хэлбэрээр бэртсэн, таван иргэний биеийн байдал маш хүнд буюу хавсарсан бэртэлтэй, хугаралтай байгаа аж.
Уг осолтой холбогдуулан Улаанбаатар хотоос Төв аймаг руу нэмэлт хүч болж, Гэмтэл согог судлалын үндэсний төв, “Мөнгөн гүүр” эмнэлгийн эмч нар очиж ажиллаж байна.
